Para calar a quen di que os médicos do HCV están alleos á reforma sanitaria e aos recortes, a Plataforma fai pública a carta que 59 facultativos deste hospital enviaron asinada á Consellería de Sanidade, dirixida á popular Pilar Farjas.
Os Facultativos do Hospital Comarcal de Valdeorras reunidos en asemblea o 6/9/11 para debater o contido do DECRETO 163/2011, do 28 de xullo, polo que se regula a estrutura organizativa de xestión integrada de Ourense, Verín e O Barco de Valdeorras, expoñemos a continuación os puntos acordados.
- Tratándose do colectivo máis importante á hora de impartir os servizos de saúde nesta Área Sanitaria, sentímonos profundamente decepcionados e até despreciados, primeiro por non contar con nós para estas modificacións, e en segundo lugar por non ser informados até o momento por ningún dos nosos superiores do alcance das mesmas.
- Queremos expresar a nosa preocupación polo desenrolo deste decreto xa que dubidamos que alcance o obxectivo para o que di que foi redactado: “obter maior rendibilidade social”
- É obvio que o orzamento do noso Hospital será manexado desde Ourense por alguén que, sen dubidar da súa eficacia, será complicado que coñeza, entenda e defenda os intereses da nosa Área.
- Ao mesmo tempo entendemos que será moi difícil que os responsábeis de Servizos do HCV poidan negociar con Ourense os recursos que consideren precisos para a correcta atención dos nosos pacientes.
- Entendemos que cos axustes orzamentarios se queira reducir e simplificar a estructura organizativa, pero, despois de ler o Decreto, observamos que esta en vez de reducirse, multiplícase, e ao mesmo tempo centralízase, alonxándose dos intereses da poboación periférica como é o noso caso.
- Fáisenos complicado pensar que con este cambio xestor se faga un aforro importante no conxunto do SERGAS cando se están realizando obras faraónicas coma o recentemente inaugurado hospital de Lugo e o que se vai iniciar en Vigo, ademais de ver como o elemento que mais medrou nos últimos anos foi a propia Administración do SERGAS.
- Moitos dos Facultativos que aquí nos atopamos, aínda sen ser da zona, traballamos por este hospital desde hai máis de 20 anos, axudamos a que crecera, afanámonos – en circunstancias moitas veces de precariedade tanto de recursos materiais como humanos – tratando de atender aos nosos pacientes en non poucas ocasións con solucións imaxinativas, sempre co obxectivo da “mellora continuada” acadando cifras de calidade e celeridade na asistencia das mellores do SERGAS. Nestes momentos, o noso Hospital nútrese tamén de profesionais mozos que sempre aportan estímulos e novidades para mellorar e optimizar os resultados. Con este decreto sospeitamos que no futuro vai acabar de raíz con todos os obxectivos acadados até agora, coa conseguinte diminución global da calidade da asistencia.
- Este Hospital foi o primeiro hospital comarcal de España, fundouse en base a que o demandou unha poboación illada xeográficamente, con comunicacións deficientes cos centros de referencia e coa actividade económica máis dinámica do interior de Galicia. Asemade, foi modelo de moitos outros hospitais comarcais. Na actualidade as comunicacións non melloraron. É obvio que existen razóns para potencialo, non para condenalo.
- Por todo o aquí exposto cremos conveniente a modificación deste Decreto, mantendo a xestión propia da nosa Área Sanitaria.
O Barco, a 8 de setembro de 2011.
Nenhum comentário:
Postar um comentário